काठमाडौं, ७ भदौ – चलचित्र ‘नाइँ नभन्नु ल ५’ भोलि शुक्रवारदेखि प्रदर्शनमा आउँदैछ । प्रचारमा खासै आक्रामक नदेखिएको फिल्मका कलाकार रिलिजको मुखमा त्यति खासै सार्वजनिक रुपमा देखिएका छैनन् । फिल्म युनिटलाई भने यो चलचित्र चल्छ भन्नेमा विश्वस्त छन् ।

किनभने यो शीर्षकमा सार्वजनिक भएका यसअघिका फिल्मले एकपछि अर्को गर्दै फिल्म हलमा दर्शक रुवाएका थिए ।

यो फिल्मले पनि एक फरक कथाबाट दर्शक रुवाउने प्रयास गर्नेछन् । फिल्मको गीत रिलिज कार्यक्रममा निर्देशक विकासराज आचार्यले भनेका थिए, ‘हामीले यो फिल्मलाई ११ औँ भागसम्म बनाउने सोच बनाएका छौँ ।’

उनका अनुसार ‘नाइँ नभन्नु ल’ लेखिएका फिल्म अझै बन्नेछन् । तर, फिल्मका कथा धारावाहिक रुपमा बग्ने छैनन् । जसरी यसअघि बगेका थिएनन् । तर, अनुभव रेग्मी भने चलचित्रमा हुनेछन् । कुनै पनि सिरिजमा अनुभव रेग्मी छुटेका छैनन् । तर अन्य कलाकार भने फेरबदल भइरहन्छन् ।

त्यसो त यसअघिका ‘नाइँ नभन्नु ल’ हरुको व्यापार पनि पहिलेको तुलनामा घट्दै आइरहेको छ । तर, यो फिल्मले भने व्यापार घटाउने हैन, बढाउनेमा निर्माण टिमको आशा छ ।

यही फिल्मबाट अभिषेक नेपालले फिल्ममा डेब्यु गर्दैछन् भने बालकलाकारमा सेड्रिना शर्माले डेब्यु गर्नेछिन् ।

नयाँ तथा पुराना कलाकारलाई लिएर निर्माण गरिएको यो फिल्म चल्छ कि चल्दैन, त्यसका लागि त एउटा विकेन्ड कुरे पुग्ने भएको छ । तर रिलिजअघि भने फिल्मका संवाद हिट भएका छन् ।