काठमाडौं, २३ साउन – तीजको रौनक नजिकिँदै गर्दा नयाँ गीत सार्वजनिक हुने क्रम पनि जारी छ । यसैबीच लोकप्रिय लोकगायिका विष्णु माझीको नयाँ गीत सार्वजनिक भएको छ ।

पछिल्ला केही वर्षदेखि तीजका गीतमा पनि विकृति आए पनि ‘मार्‍यो दैया’ बोलको यो गीतले भने दर्शकको मन छुन्छ ।

विष्णु माझीको सुरिलो स्वरमा रहेको यो गीतलाई ‘पुतलीको भट्टी भाग १४’ भनिएको छ । गीतमा छोरीको पीडा र विदेश जानुपर्ने पीडालाई गीतका शब्दमा निकै कलात्मकका साथ उनिएको छ ।

सपना म्युजिक प्रालिले बजारमा ल्याएको यो गीतलाई सुन्दरमणि अधिकारीले शब्द र संगीत दिएका हुन् ।

त्यस्तै गीतको भिडियोलाई शिव बिकले निर्देशन गरेका छन् भने अभिनेत्री नीता ढुंगानाले मन छुने अभिनय गरेकी छिन् ।

गीतको भिडियोलाई शम्भु चालिसेले छायांकन गरेका हुन् भने सुजन शाहीले सम्पादन गरेका हुन् ।