काठमाडौं, १ असार – दशैंको अवसर पारेर रिलिज हुने भनिएको चलचित्र ‘जय भोले’ ले एक गीत सार्वजनिक गरेको छ ।

काठमाडौंमा एक भव्य कार्यक्रमको आयोजना गरेर ‘उम्लियो भने पोखिन्छ’ बोलको गीत सार्वजनिक गरिएको थियो ।

निर्धारित समयभन्दा धेरै ढिलागरी शुरु भएको कार्यक्रममा फिल्मका प्रायः कलाकार उपस्थित थिए भने पत्रकार तथा अन्य गेस्टको पनि उत्तिकै बाक्लो उपस्थिति थियो ।

फिल्ममा समावेश लोक लयको यो गीतलाई राजनराज शिवाकोटी र मेलिना राईले स्वर दिएका छन् भने संगीत शिवाकोटीले नै दिएका छन् ।

गीतको भिडियोमा फिल्मका मुख्य कलाकार अटाएका छन् । स्वस्तिमा खड्का र सलोन बस्नेतको जोडीलाई देखाइएको गीतको भिडियोमा सौगात मल्ल, खगेन्द्र लामिछाने, बुद्धि तामाङ, राजाराम पौडेल लगायतका कलाकार पनि फिचरिङमा छन् । साथै यो फिल्ममा खगेन्द्र लामिछानेलाई पहिलोपटक नाचेको देख्न सकिन्छ ।

कमेडी जानरामा निर्माण भएको यो फिल्मलाई अशोक शर्माले निर्देशन गरेका हुन् । झण्डै डेढ करोडको बजेटमा तयार पारिएको यो फिल्ममा अशोक शर्माले लगानी पनि गरेका छन् । फिल्ममा उनको अभिनय पनि देख्न सकिन्छ ।

त्यस्तै चलचित्रमा पुरुषोत्तम प्रधानको छायांकन, खगेन्द्र लामिछानेको पटकथा, राज ढुंगानाको सम्पादन र रोशन विक्रम भट्टराईको एक्सन छ ।