काठमाडौं, २७ माघ – शुक्रवारबाट देशभर एकसाथ प्रदर्शनमा आएको अनमोल केसी अभिनित चलचित्र ‘कृ’ रिलिजसँगै काठमाडौंका धेरै हल हाउसफूल भएका छन् । फिल्म हलमा अनमोल केसीको क्रेज ह्वात्तै बढेको छ । दुई वर्षपछि हल छिरेका युवा स्टार अनमोल केसी  चलचित्र प्रदर्शनको दोस्रो दिन काठमाडौंको गोपीकृष्ण हलमा देखिए ।

दर्शकको ठेलमठेल भीडलाई नेपाल प्रहरीले नियन्त्रण गरिरहेको थियो भने अनमोल केसी कारबाट गोपीकृष्ण हल आउँदा दर्शकले हुटिङ गर्दै अनमोलको स्वागत गरेका थिए । शनिवार दिउँसो अदितिसँग हल पुगेका अनमोलको क्रेज यति बाक्लो थियो कि, दर्शकले अनमोलसँग हात मिलाउन पनि तँछाडमछाड गरिरहेका देखिन्थे ।

अनमोल अभिनित ‘कृ’ रिलिज भएसँगै विदेशी फिल्म लागेका केही हलमा पनि ‘कृ’ नै देखाइएको छ । हल पुगेका अनमोलले दर्शकसँग खुशी व्यक्त गर्दै नेपालको राष्ट्रिय गीत ‘सयौं थुंगा फूलका हामी’ गाएका थिए ।

दर्शकलाई अभिभादन गरेपछि पत्रकारसँग कुरा गर्दै अनमोलले आफूले कडाभन्दा कडा मेहनत गरेको बताए । दर्शकले देखाएको मायाले आउने दिनमा अझै मेहनत गरेर मेहनत गर्न उत्साह मिलेको बताए । उनले भने, ‘दर्शकले नेपाली फिल्मलाई माया गर्नु सबैका लागि खुशीको कुरा हो ।’

दर्शकले आफूप्रति देखाएको स्नेह र क्रेजबारे कहिलेकाहीं आफैले सोच्दा म त्यति ‘डिजर्भ’ छैन कि भनेर सोच्ने गरेको पनि उनले बताए ।

‘कृ’ बाट नेपाली फिल्ममा डेब्यु गरेकी अभिनेत्री अदिति बुढाथोकीले यो चलचित्रले फिल्मको क्रेज देख्दा आफू खुशी भएको बताइन् ।

सुरेन्द्र पौडेलले निर्देशन गरेको फिल्ममा अनमोल केसी र अदिति बुढाथोकीको मुख्य भूमिका छ भने चलचित्रमा अनुप विक्रम शाही, कामेश्वर चौरासिया, लक्ष्मी गिरी, रुपा राना लगायतका कलाकारले अभिनय गरेका छन् । चलचित्रमा भुवन केसी र सुवास गिरीले संयुक्त रुपमा लगानी गरेका हुन् ।

तस्वीरः मिलन ढुंगाना