काठमाडौं, २९ साउन – चलचित्र ‘इन्टु मिन्टु लण्डनमा’ को ‘लण्डनमा’ बोलको गीत सार्वजनिक भएको छ । फिल्म निर्माण टिमले युट्युबमार्फत गीत सार्वजनिक गरेको हो ।

रेनाशा वान्तवा राईले निर्देशन गरेको फिल्मको यो गीतमा सुजिल कर्माचार्यको स्वर तथा शब्द रहेको छ ।

गीतको भिडियोमा डेब्यु अभिनेता धिरज मगरलाई गायकका रुपमा प्रस्तुत गरिएको छ भने गीतमा लण्डनको व्यस्तता र मान्छेको जीवनीलाई कथानक बनाइएको छ ।

साथै भिडियोमा धिरज मगर र साम्राज्ञी शाहलाई फिचरिङ गराइएको छ । आइकोर फिल्मको ब्यानरमा निर्माण भएको यो फिल्मलाई प्रज्वल शमशेर जबरा र प्रभुशमशेर जबराले निर्माण गरेका छन् ।

फिल्मलाई शैलेन्द्रध्वज कार्कीले छायांकन गरेका छन् भने सारुक ताम्राकार, दिलभुषण पाठक, विजय लामा, रुवी राणा लगायतका कलाकारले अभिनय गरेका छन् ।

असोज ५ गतेबाट रिलिज हुने यो फिल्म रेनाशा बान्तवा राईको निर्देशकीय डेब्यु फिल्म भए पनि उनी रिलिजअघि नै चर्चामा छिन् ।