काठमाडौं, ३० चैत – चलचित्र ‘जय भोले’ को टिजर सार्वजनिक भएको छ । यो फिल्मलाई वर्षको प्रतिक्षित फिल्म मानिएको छ । निर्देशक अशोक शर्मा १२ वर्षपछि निर्देशनमा यहि फिल्ममार्फत फर्किएका छन् ।

ह्युमर तथा सोसल कमेडी ड्रामामा खगेन्द्र लामिछाने, सौगात मल्ल, स्वस्तिमा खड्का, सलोन बस्नेत, राजाराज पौडेल लगायतका कलाकारले अभिनय गरेका छन् । टिजरमा सौगात, खगेन्द्र लगायतका कलाकारको भूमिका फरक लाग्दो छ । आगामी दशैंको फूलपातीमा रिलिज हुने सिनेमाले दुई केटा साथीबीचको भावनात्मक मित्रता र प्रेमको कथा भन्छ ।

चलचित्रलाई १ करोड ६० लाखमा निर्माण गरिएको हो । सिनेमामा खगेन्द्र लामिछानेको पटकथा, पुरुषोत्तम प्रधानको छायांकन, राजनराज सिवाकोटी/कल्याण सिंहको संगीत, राज ढुंगानाको सम्पादन, बसन्त श्रेष्ठको नृत्य र रोशनविक्रम भट्टराईको एक्सन रहेको छ ।

सिनेमालाई निर्देशक शर्माले नै निर्माण गरेका हुन् ।